Háskóli Íslands

Nýtt rit: Alþjóðlegur skattaréttur

Lagastofnun Háskóla Íslands hefur gefið út ritið Alþjóðlegur skattaréttur eftir Stefán Má Stefánsson, Ragnheiði Snorradóttur og Kristinn Má Reynisson.

Alþjóðlegur skattaréttur fjallar um skattlagningu þegar viðskipti og réttarstaða skattaðila tengjast fleiri en einu ríki og leysa þarf úr því hvert ríkjanna eigi skattlagningarrétt. Í ritinu er að finna heildstæða umfjöllun um alþjóðlegan skattarétt, með áherslu á tvísköttun, tvísköttunarsamninga, evrópskar skattareglur og reglur um gagnkvæm upplýsingaskipti milli ríkja í skattamálum. Í ritinu er gerð grein fyrir helstu reglum sem þetta varða auk viðeigandi framkvæmdar dómstóla og skattyfirvalda bæði hér á landi og víðar. Efni ritsins er í aðalatriðum byggt á ritinu Tvísköttunarsamningar og evrópskar skattareglur sem kom út árið 2011 í ritröð Lagastofnunar Háskóla Íslands.

Hægt er að panta ritið með tölvupósti á netfangið lagastofnun@hi.is. Ritið verður einnig fáanlegt í Bóksölu stúdenta og í bóksölu Úlfljóts.

Einnig er hægt að gerast áskrifandi að ritröð/ritum Lagastofnunar. Áskrifendum bjóðast sérkjör á nýjum ritum og fá þau póstsend jafn óðum og þau eru gefin út. Hægt er að gerast áskrifandi með því að fylla út rafrænt eyðublað eða með tölvupósti á netfangið lagastofnun@hi.is.

Þú ert að nota: brimir.rhi.hi.is